بسم الله الرحمن الرحيم
يا ولالالالالالالالالالالاد
تعالو هنا
هنتكلم شويه وبابا نايم علشان مش يسمعنا بقه
انا دخلت على بابا الاوضة لقيته لسه نايم مش هيقوم دلوقتى
تعالوا نخطفلنا كلمتين
انا بقالي يومين عماله اشتكى من أبوكوا .
قولت بقه اعرفكوا حاجه
ان أبوكوا ده اجمل راجل عندي
وهو وعدني ان احساس الاهمال ده مش هيتكرر .. وانه طبعا مش قصده يهمل ماما حبيبته
هى بس أزمة الشغل كانت مغيراه شويه .. ووعدنى كمان ان المشوار المهم في حياتنا يدوب هو بس اخر الاسبوع ويكون نتيجته
وصلت .. وكمان اخر الشهر ان شاء الله وتنتهى مشكلتنا دى خااالص .. ادعوا بقه مع ماما ( يـــــــــــــــــــــــارب )
انا مصدقه بابا وواثقه فيه
عارفين يا ولاد احسن حاجه بين ماما وبابا ايه ؟؟
ان كل واحد فينا متأكد ان التانى بيحبة اوى وميقدرش يعيش من غيره
عارفين .. انا وبابا حصل بينا حاجات كتيييييييييييييير وحشة
مشاكل وأزمات من كل الانواع
مشاكل عائلية .. ومادية .. ونفسية .. ومشاكل خاصة كمان
مشاكلى مع بابا للأسف علشان بابا عصبي و أنا كمان مش هادية أوى كانت بتوصل لمراحل متأخره يصعب علاجها
وكان أى حد بيدخل بينا مش بيعرف يصالحنا
بس احنا الاتنين اللى كنا بنرجع لوحدنا .. والغريب ان بعد كل مشكلة كبيرة يا ولاد كنا بنرجع احسن من الاول
وكأن مشاكلنا دى بتقوى العلاقة بينا مش بتهزها
كنت علطول ببقي خايفه مشاكلى مع بابا تكون بتأثر على نسبة حبة ليه
وهو كمان اعترفلي انه هو كمان كان بيخاف حبي ليه يقل
بس اللى اكتشفناه انه بيزيد اوى
...................
سيبكوا من ده انا عاوزه اقولكوا انا وابوكوا قولنا ايه النهارده
بس اوعوا تفتنوا لبابا
أولا : بابا قالى خبر مش حلو .
عارفين مصطفي وملك صحابكوا ؟؟
مامتهم وباباهم عمو ( م. ص) انفصلوا
هما لسه متجوزين مش بقالهم كتير .. وولادهم صغيرين زيكوا كده
انا وبابا زعلنا اووووووووى
وماما قاعده تفكر كتير ازاى ممكن تحاول ولو بسيط تصلح اللى حصل علشان الاولاد على الاقل
النهارده اكتشف اد ايه انا وبابا بنحبكوا .. لان عمرنا مهنفكر في الانفصال مهما حصل
ودى الكلمة اللى انا وبابا كنا بنقولها من يوم معرفنا بعض
هو يقولى لاخر يوم ؟؟
اقوله لاخر يوم
انا اقوله مهما حصل ؟؟
يقولى مهما حصل
احنا بنخاف على اللى بينا اوى وعليكوا يا حبايبي
مش عاوزاكوا تخافوا ابدا
بابا كمان قالى انه بيغير عليه أوى .. من زمان مش قالى ده
قالى مواقف قديمة اوى كان غيران فيها اوى عليه
وانا كمان قولتله انى بغير عليه اوى
وان زمان كنت بتقطع من البنت اللى كانت بتشتغل عنده .
انا بحب بابا أوى يا ولاد وبحبكوا
وهو كمان بيحبنى اوى وبيحبكوا
ربنا يخليك ليه يا حبيبي
ويخليكوا ليه يا حبايب ماما
يلا .. الى اوضتكوا علشان تلعبوا سوا
حبايبي .. حبوا بعض والعبوا سوا .. وخلى بالكوا من بعض .. وحافظوا دايما على اللى بينكوا
لاااااااااخر يوم ..... ومهما حصل
أمضاء
ماما
